SAYYED HASSAN NASRULLA: SAUDIA NDIO KIKWAZO CHA UTULIVU WA SYRIA NA LEBANON.

Katibu Mkuu wa harakati ya Hizbullah ya Lebanon Sayyid Hassan Nasrullah amesema kuwa Saudi Arabia ndiyo kikwazo kikuu cha kupatikana amani na utulivu katika nchi za Syria na Lebanon. Huku akiashiria makundi ya kigaidi yaliyohusika katika milipuko kadhaa ya mjini Beirut, Sayyid Nasrullah amesema Saudia ndio kikwazo kikuu cha amani na utulivu wa Lebanon na Syria. Ameashiria mapigano na milipuko iliyotokea katika mji wa Tripoli kaskazini mwa Lebanon na kuongeza kuwa, matukio yanayojiri mjini humo yanatokana na njama za maadui wanaokusudia kuitumbukiza Lebanon katika vita vya ndani. Sambamba na kusisitiza juu ya udharura wa kutatuliwa mgogoro wa kaskazini mwa Lebanon, Katibu Mkuu wa chama cha Hizbullah amesema kwamba, serikali inapaswa kuchukua hatua za haraka za kutafuta mgogoro wa eneo hilo.

Katika upande mwingine, Sayyid Nasrullah amesema, suala la kupindua kijeshi serikali ya Syria ni chaguo lililoshindikana na kwamba pande zote isipokuwa Saudia, zinataka kutatuliwa kisiasa mgogoro wa Syria. Sayyid Nasrullah vilevile amesisitiza juu ya udharura wa kuundwa serikali ya umoja wa kitaifa nchini Lebanon chini ya uongozi wa Tamam Salam na kuongeza kuwa, Saudi Arabia inazuia kuundwa serikali mpya nchini humo.

Kuhusiana na hilo mtandao wa habari wa Syria umeashiria mapigano yaliyotokea kati ya watu wenye silaha katika mji wa Tripoli kaskazini mwa Lebanon na kueleza nafasi haribifu ya Wasaudi na mamluki wao katika eneo hilo. Kwa mujibu wa taarifa hiyo, mara zote makundi yenye silaha ya kigaidi na wafuasi wao nchini Syria yanapopata kipigo kikali huanzisha mapigano katika eneo la 'Jabal Muhsin' kwenye mji wa Tripoli .

Wachambuzi wa mambo wanasema kuwa, ukosefu wa utulivu katika mji wa Tripoli kaskazini mwa Lebanon unachangiwa na mgogoro wa Syria. Katika mapigano ya siku kadha zilizopita kati ya wafuasi na wapinzani wa serikali ya Syria kwenye maeneo ya Jabal Muhsin na Babul Bitana kwenye mji huo, watu 12 waliuawa na wengine wasiopungua 100 wakiwemo askari 17 wa jeshi la Lebanon kujeruhiwa. Serikali ya Lebanon imetangaza kuwa, imekabidhi jeshi la Syria jukumu la kusimamia kikamilifu usalama wa mji wa Tripoli kwa muda wa miezi 6.

Allama Sheikh Afifa Nablisi ambaye ni mkuu wa Baraza la Maulamaa wa Jabal Amil nchini Lebanon ameielezea hali ya hivi sasa ya mji wa Tripoli kuwa ni ya hatari sana na kusisitiza kuwa, kuna haja jeshi na serikali zishughulikie haraka hali ya kaskazini mwa Lebanon ili kuzuia mapigano zaidi. Pia Sheikh Mahir Hamud mmoja wa viongozi wa Kisuni wa Lebanon sambamba na kukosoa machafuko yanayosababishwa na makundi ya takfiri yanayofanyika kwa kutumia dini, amesisitiza juu ya udharura wa kudumishwa uungaji mkono kwa muqawamah dhidi ya adui Mzayuni. Sheikh Mahiz Hamuz ameongeza kuwa, utawala wa Kizayuni wa Israel ndiye adui mkubwa wa makundi ya mapambano na kwamba Israel inapanga njama za pande zote dhidi ya muqawamah na kutekeleza jinai za aina mbalimbali.

Utawala wa Kizayuni wa Israel na Saudia zinaripotiwa kufanya njama dhidi ya taifa la Lebanon katika hali ambayo, siku ya Jumanne mmoja wa makamanda wa ngazi za juu wa Hizbullah alishambuliwa na kuuawa shahidi na watu waliokuwa na silaha mjini Beirut. Hizbullah imetangaza kuwa utawala wa Kizayuni ndio uliohusika moja kwa moja mauaji ya kamanda huyo.