Mwanamapambano mmoja wa Palestina amekufa shahidi wakati akiwa katika mafunzo ya kijihadi kwenye Ukanda wa Ghaza.
Brigedi za Izzuddin Qassam, tawi la kijeshi la Harakati ya Mapambano ya Kiislamu ya Palestina HAMAS limetangaza kuwa, Muhammad Musa Astal, mmoja wa wanapambano wa Palestina amekufa shahidi akiwa katika mafunzo ya kijihadi kwenye handaki moja huko Khan Yunus, kusini mwa Ukanda wa Ghaza.
Kwa mujibu wa ripoti hiyo, Muhammad Musa Astal (31) amekufa shahidi baada ya kuporomoka sehemu moja ya ukuta wa handaki hilo.
Brigedi za Izzduddin Qassam zimesema pia kuwa, wanamapambano wa Palestina wamejitolea kila kitu chao katika njia ya Mwenyezi Mungu na wataendelea kupambana na utawala ghasimu wa Kizayuni hadi sekunde ya mwisho ya maisha yao.
Katika upande mwingine, wanajeshi wa utawala wa Kizayuni wameuzingira mji wa Nablus katika Ukingo wa Magharibi wa Mto Jordan. Operesheni hiyo iliyoanza jana imeendelea leo kwa kuwekwa ulinzi mkali katika maeneo yote ya kuingilia mjini humo.
Hatua hizo za Israel zimechukuliwa baada ya wanajeshi wa utawala wa Kizayuni kushindwa kuzima Intifadha ya Wapalestina.
