IRAN HAIBABAISHWI NA VITISHO VYA MAREKANI.
Khatibu wa sala ya Ijumaa iliyosaliwa mjini Tehran amesema kuwa, ujumbe
muhimu wa Mamilioni ya wananchi wa Iran waliojitokeza kwenye maandamano
ya kuadhimisha miaka 36 ya ushindi wa Mapinduzi ya Kiislamu hapa nchini
Iran, ni Izza, utukufu na kutosalimu amri mbele ya madola ya kibeberu ya
Magharibi. Ayatullah Sayyid Ahmad Khatami ameongeza kuwa, kujitolea,
uaminifu, umoja na mshikamano kati ya wananchi wa Iran ni sehemu
nyingine ya ujumbe wa wananchi wa Iran walioshiriki kwa Mamilioni
kwenye maadhimisho hayo. Ayatullah Khatami amebainisha kwamba, yapo
baadhi ya mapinduzi yaliyojitokeza duniani lakini yalisambaratika baada
ya kupita miaka kadhaa, lakini maandamano ya siku ya Jumatano nchini
Iran yamewaonyesha walimwengu kwamba, Mapinduzi ya Kiislamu nchini Iran
yanazidi kupata nguvu na uungaji mkono wa wananchi kila mwaka. Khatibu
wa sala ya Ijumaa ya Tehran amesema kwamba, hadi sasa mapinduzi ya
Kiislamu bado hayajachuja na kinyume chake yamekuwa kigezo na kutoa
hamasa kubwa kwa baadhi ya nchi nyingine duniani. Ayatullah Khatami
ameelezea mwenendo wa mazungumzo ya nyukia kati ya Iran na kundi la 5+1
na kusisitiza kwamba, matamshi ya hivi karibuni ya Kiongozi Muadhamu wa
Mapinduzi ya Kiislamu yameweza kuzima njama za madola ya Magharibi na
hasa Marekani. Ayatullah Khatami amesisitiza kwamba, vitisho na vikwazo
vya Wamagharibi kamwe havikuishinikiza Iran iketi kwenye meza ya
mazungumzo ya nyuklia, bali azma kuu ya Iran ya kuketi kwenye meza ya
mazungumzo na nchi sita zenye nguvu duniani ni kutaka kuuthibitishia
ulimwengu kwamba miradi ya nyuklia ya Iran inatekelezwa kwa malengo ya
amani.
Chuo Kikuu cha Durban nchini Afrika Kusini kimelaani vikali jinai za
kivita zinazofanywa na utawala wa Kizayuni wa Israel dhidi ya wananchi
wa Palestina na kutaka kuchukua maamuzi ya kuwatimua wanafunzi wote wa
Kizayuni wanaosoma kwenye chuo hicho. Mkuu wa Kitengo cha Wanachuo
katika Chuo Kikuu cha Durban ameeleza kuwa, mwanafunzi yeyote wa Israel
ambaye ataonekana akiunga mkono jinai zinazofanywa na Wazayuni dhidi ya
wananchi wa Palestina wa eneo la Ukanda wa Ghaza au Ukingo
wa Magharibi mwa Mto Jordan atafukuzwa chuoni mara moja. Wakati huohuo
Baraza la Chuo Kikuu cha Durban kimeomba lisitishwe zoezi la kuwasajili
wanafunzi kutoka Israel na kupiga marufuku msaada wa masomo
'scholarship' unaotolewa na utawala wa huo kwa wanafunzi wanaotaka
kuendelea na masomo mjini Durban nchini Afrika Kusini. Mara kadhaa mji
wa Durban, umekuwa mwenyeji wa mikutano kadhaa ya kimataifa ya kulaani
vitendo vya kibaguzi vya utawala wa Israel dhidi ya wananchi wa
Palestina. Chanzo cha habari: http://kiswahili.irib.ir/…/46629-chuo-kikuu-cha-durban-kuwa…
