MAZUNGUMZO YA NYUKLIA, HAKI ZA BINADAMU KATIKA HOTUBA YA KIONGOZI MUADHAMU:

Kiongozi Muadhamu wa Mapinduzi ya Kiislamu Ayatullah Ali Khamenei jana alihutubia mjumuiko mkubwa wa maulamaa, wanazuoni na watu wa matabaka mbalimbali wa mkoa wa Qum sambamba na hauli ya 36 ya harakati ya kihistoria ya watu wa mji huo dhidi ya utawala wa Shah. Katika hotuba yake Kiongozi Muadhamu alisema kuwa moja ya mambo muhimu ya harakati hiyo ya watu wa Qum ni kutegemea imani yao kubwa kwa Mwenyezi Mungu sambamba na kuwa na maarifa na uoni wa mbali katika mazingira magumu ya kupambana na adui.

Uzoefu wa kihistoria wa taifa la Iran kabla na baada ya ushindi wa Mapinduzi ya Kiislamu umeonesha kuwa, taifa hilo daima limekuwa likiwashinda maadui kwa kutegemea imani yake kubwa kwa Mwenyezi Mungu na kuwa na maarifa na kuona mbali. Ushindi wa Iran katika vita vya miaka minane vilivyoanzishwa na utawala wa Saddam, kuvuka vipindi na misukusuko mingi na migumu ya vikwazo na kuwa macho mbele ya njama mbalimbali za kisiasa katika kipindi cha miaka kadhaa iliyopita na kuweza kuzima njama hizo ni vielelezo vya wazi vya imani kubwa ya taifa la Iran na kuwa kwake makini katika vipindi mbalimbali vya uhai wa Mapinduzi ya Kiislamu hapa nchini.

Miongoni mwa mambo yaliyoashiriwa na Kiongozi Muadhamu wa Mapinduzi ya Kiislamu katika hotuba yake ya jana ni mazungumzo ya nyuklia yanayoendelea kati ya Iran na kundi la 5+1. Amesisitiza kuwa mazungumzo hayo hayatokani na mashinikizo ya vikwazo bali Iran inafanya mazungumzo kwa mujibu wa maslahi yake.

Baada ya kuja madarakani serikali mpya hapa nchini, suala la kuamiliana na mfumo wa kimataifa kwa mujibu wa kuheshimiana lilipewa kipaumbele katika siasa za nje za Jamhuri ya Kiislamu. Muamala mzuri wa Iran mkabala wa nchi za Magharibi ambao ulikaribishwa sana na watu wa Ulaya ulizilazimisha serikali za nchi za Magharibi kuketi kwenye meza ya mazungumzo ya nyuklia na Iran. Duru kadhaa za mazungumzo hayo ya Iran na kundi la 5+1 huko Geneva zimeonesha kwamba, Tehran haikuingia katika mazungumzo kwa sababu ya mashinikizo ya vikwazo.

Kabla ya kuanza mazungumzo hayo nchi za Magharibi hususan Marekani zilitishia kuwa zingeshambulia taasisi za kuzalisha nishati ya nyuklia hapa nchini. Hata hivyo matokeo ya mazungumzo ya tarehe 24 Novemba 2013 yameonesha kuwa Wamagharibi hawana njia nyingine ghairi ya kuamiliana na Iran.

Suala la haki za binadamu ni miongoni mwa mambo yaliyoashiriwa na Kiongozi Muadhamu katika hotuba ya jana. Amesema Wamarekani hawana haki ya kuzungumzia maudhui ya haki za binadamu kwa sababu serikali ya Marekani ndiyo mvunjaji mkubwa wa haki hizo duniani.

Wamagharibi hususan Marekani wamekuwa wakitumia suala la haki za binadamu kwa ajili ya kufikia malengo yao nchini Iran. Hata hivyo ushahidi na nyaraka za kuaminika zinaonesha kuwa, wanaodai kuwa vinara wa haki za binadamu duniani ndio hao hao wavunjaji wakubwa wa haki hizo. Mauaji ya watoto wadogo na wanawake wa Afghanistan, Pakistan na Yemen kutokana na mashambulio yanayofanywa na ndege zisizo na rubani za Marekani (drone), mateso yaliyofanywa na Wamarekani dhidi ya wafungwa katika jela za Abu Ghuraib huko Iraq, Guantanamo Bay Cuba na Bagram huko Afghanistan na uungaji mkono wa Washington kwa jinai zinazoendelea kufanywa na utawala wa Kizayuni wa Israel dhidi ya taifa la Palestina ni sehemu ndogo tu ya ukiukaji mkubwa wa haki za binadamu wa Marekani na waitifaki wake.

Na Amir Ibrahim Rutajengwa. (irib)