Katika kipindi ambacho jeshi la Syria linaonekana kupata
mafanikio makubwa kwenye vita vyake dhidi ya makundi ya kigaidi yenye
silaha, inaonekana sasa kumejitokeza medani nyingine ya mapambano yenye
lengo la kufunika mafanikio hayo dhidi ya magaidi. Baadhi ya nchi za
Kiarabu pamoja na nchi za Magharibi zikiongozwa na Marekani,
zimeshadidisha vita vya kipropaganda kwa kutumia vyombo vyao vya habari
vya kimataifa dhidi ya Rais Bashar Asad na jeshi lake. Mfano uliohai
umeonekana kupitia matangazo ya jana Jumatano Agosti 21 kwenye kanali za
televisheni za Al-Jazeera ya Qatar na Al-Arabiya ya Saudi Arabia ambazo
zimetangaza kwamba jeshi la Syria lilitumia silaha za kemikali dhidi ya
raia wasio na hatia kwenye eneo la al-Ghouta lililoko mkoani Rif
Dimashq, kusini mwa nchi hiyo. Kanali hizo zimedai kwamba makumi ya watu
waliuawa kwenye shambulizi hilo. Weledi wa mambo wanaamini kwamba, vita
hivyo vipya vya kipropaganda dhidi ya serikali ya Rais Bashar Asad
vinalenga kuvuruga uchunguzi wa wataalamu wa Umoja wa Mataifa
wanaochunguza matumizi ya silaha za sumu nchini Syria. Wataalamu hao wa
UN waliwasili Syria Jumapili iliyopita mjini Damascus na kazi yao kubwa
ni kuchunguza madai ya kutumiwa silaha za kemikali katika nchi hiyo ya
Kiarabu. Hii ni katika hali ambayo, Machi 19 mwaka huu, magaidi wenye
silaha walitumia silaha za kemikali dhidi ya wananchi wanaomuunga mkono
Rais Bashar Asad katika eneo la Khan al- Assal huko Aleppo na
kusababisha maafa makubwa. Pia magaidi hao walitenda jinai nyingi dhidi
ya binadamu katika eneo hilo.
Itakumbukwa kuwa, Russia iliwahi kutoa ripoti kwa Umoja wa Mataifa
ikeleza kwamba magadi wa Syria wametumia silaha za kemikali na ili
kuthibitisha madai hayo, Moscow ilitoa nyaraka zinazofafanua suala hilo.
Ni kutokana na kufichuliwa jinai hiyo ya magaidi wa Syria ya kutumia
silaha za sumu dhidi ya raia na wanajeshi wa serikali na hatua ya
Damascus ya kuwakaribisha wataalamu wa Umoja wa Mataifa ili kuchunguza
kadhia hiyo, ndio maana nchi za Kiarabu na zile za Magharibi
zikashadidisha vita vya kipropaganda dhidi ya Rais Assad na jeshi lake.
Wizara ya Mambo ya Nje ya Syria imekanusha madai yaliyotolewa na kanali
za Al-Jazeera na Al-Arabiya kwamba jeshi la serikali lilitumia silaha za
kemikali na kusisitiza kwamba propaganda hizo hazitafaulu wala kuathiri
mafanikio ya jeshi kwenye vita vyake dhidi ya ugaidi. Taarifa ya Wizara
ya mambo ya Nje ya Syria imesema kuwa, serikali imekubali kwa maandishi
kushirikiana kikamilifu na wachunguzi wa UN na wakati huohuo imelaani
magaidi kwa kutumia silaha za sumu na hivyo kusababisha maafa na
uharibifu mkubwa. Wizara ya Mambo ya Nje ya Syria pia imesisitiza kuwa
iko tayari kushiriki kwenye kongamano la kimataifa la Geneva 2 ili
kuzungumzia mgogoro unaoikumba nchi hiyo na kuutafutia ufumbuzi wa
amani. Hata hivyo taarifa ya wizara hiyo imeelezea masikitiko yake kwa
kile ilichosema ni njama za Saudia na Qatar na mabwana wao wa Magharibi
za kuvuruga kila juhudi zinazofanywa kwa lengo la kuutatua mgogoro huo
kwa njia za kidiplomasia.
Magaidi wa Syria wanaendelea kupokea misaada ya silaha na fedha
kutoka kwa baadhi ya nchi za Kiarabu zikiwemo Qatar na Saudi Arabia
pamoja na nchi za Magharibi, na kwa mantiki hiyo, hatua yoyote inayoweza
kupelekea kuanikwa hadharani jinai zao inaweza kutoa pigo kwa wafadhili
wao na kuzima njama zao za kuipindua serikali halali ya Damascus. Hivyo
basi, juhudi zote zinafanywa kuhakikisha hilo halifanyiki. Habari kutoka http://kiswahili.irib.ir/
